रेंग तँय ह सत के रद्दा म, असत ले छोड़ा ले पाछू।
आखिर म जीत होही तोर, रहिबे सब जन ले आगू।।
दाई-ददा के सेवा कर, जीते-जियत म मत दे दुख।
सियान के कहना ल मान, बाद म पाबे तँय ह सुख।।
पर नारी ल माता मान, झन लगा ओखर बर बानी।
रावन घलो ह नइ बाँचिस, जेन ह रहिस अभिमानी।।
अदि करना हे त मदद कर, गरीब मन के कर भला।
तोला दुआ मिलही उँकर, मन म खुशी के दीया जला।।
मितान मेर निभा मितानी, सुख-दुख म संग दे ओला।
आगू-के-आगू ले कर बूता, तभे जम्मो सहराहीं तोला।।
गुरु के हरदम कर बंदना, ओखर मत करबे अपमान।
तँय ह सबले बढ़िया बनबे, जग म पाबे खूब सम्मान।।
जब भी बोल गुरतुर बोल, हमेशा काम के पूरता बोल।
चारी-खोदारी ले दुरिहा रह, जिनगी म महुरा मत घोर।।
लड़ई, झगरा ले कोनों नइ बने, होथे ग बिंदरा-बिनास।
छीन भर के गुस्सा हे अंगरा, जरो के करथे सत्यानाश।।
दारु, मंद के चक्कर छोड़, जियन दे बोकरा, कुकरी ल।
पढ़-लिख के लायक बन, गियान मंतर फूँक फूँकनी म।।
एकता ले रहव जुरमिल, देश बिकास खातिर काम कर।
फेर आही संगी रामराज, तँय तो प्रभु राम जइसन बन।।
- अशोक कुमार यादव, मुंगेली, छत्तीसगढ़
